كيفية العناية للجسم والوجه

اولا :العنايه اليوميه.
اول ما تنشين الصبح((تصحين)) تغسلين ويهج بغسول عقبه التونك وعقبه كريم النهار او واقي من الشمس اذا كنتي موظفه او طالبه او بتمين يومج كله برع((خارج))البيت

وقبل النوم مسحي اي مكياج على ويهج وعقبها غسلي ويهج بالغسول وعقب امسحيه بالتونك وعقب حطي كريم الليل و..نووم العوافي

بخصوص واقي الشمس:

طبعا الواقي بتختارينه على حسب نوع بشرتج

وضروري تحطي الواقي قبل تعرضتج للشمس بنص ساعة والا بتشوفين نتيجة عكسية ويضاعف تأثير الشمس على البشرة بخمسة مرات اكثر

>> يعني بتحرق الشمس ويهج بخمسة مرات اكثر من عدم استعمال الواقي

يعني البنات اللي يقولو ان الواقي يسمر البشرة

هذا لانهم يحطوه ويتعرضو للشمس مباشرة فتسمر البشرة بزيادة

وترى الواقي ينحط على كامل الوجه والرقبة واي جزء ظاهر من الجسم يعني لو لابسة بلوزة كت حطي على كامل الاكتاف ووالايادي

في واقي شمس على شكل بخاخ وهو مناسب للجسم لانه سريع وعملي


ثانيا :العناية الاسبوعية

طبعا اغلبنا نحط اقنعة على ويهنا بس نلاقي بعض البنات يقولون انا جربت اقنعة وماشفت اي نتيجه

وهذا لانها تستخدمه بطريقة غلط

يعني ممكن تكون ما تهتم ببشرتها

وتتوقع ان القناع لوحده هو الي بيعطيها النتيجه الي تبيها

او تكون عندها مشكلة جلدية وماعالجتها ولا سارت عند للدكتور وتتريا ان الخطات والاقنعه هي الي بتحل هاي المشكله

طبعا القناع مفيد بس لاتصدقين اللي يقولون انه ممكن يصلح كل عيوب بشرتج ..

اكيد لا

لازم يكون في عناية وترطيب وتقشير وعقبه القناع

واذا تعانين أي مشكلة في ويهج(حبوب –كلف-حساسية-الخ..)سيري عند الدكتور وتعالجي.


نرد لموضوعنا..


احسن وقت تحطين فيه القناع هو عقب التقشير

واستعمليه مرة او مرتين فالاسبوع لان كثرة الاقنعة والخلطات اتعب البشرة


التقشير:


طبعاهومهم جدا -للوجه والجسم - فالبشرة تتجدد كل 21 يوم

وبالتقشير والعناية بتتخلصين من الاسمرار واثار حب الشباب اللي على الويه

وبيكون عندج بشره طفوليه وناعمه

اذا كان عمرج بين 20-30 سوي تقشير للبشره مره وحده اسبوعيا

واذا كنتي بين 30-40 مرتين اسبوعيا

او اذا كنتي فوق 40 سويه ثلاث مرات اسبوعيا

ولا تسوين تقشير لويهج او لجسمج اذا كنتي تحت ال 20 سنه


بالنسبة للوجه:

يكون مقشر طبي ولطيف
وافضل وقت للتقشير قبل النووم
قبل ما تسيرين تنامي سيري غسلي ويهج بالغسول وحطي المقشر فـ يدج وعقب وزعيه على الويه والرقبه وقشري بحركات دائريه بخفه وبسرعه لان العمليه كلها ماتاخذ دقيقتين>>>لان بشره الويه رقيقه ومايبيلها تقشير بقوه



عقبها ييبي قناع مناسب لبشرتج سواء طبيعي انتي سويتيه فالبيت او من الصيدليه-عقب حطي القناع على ويهج لين ما يجف وعقب نزليه بالماي((ماء))وامسحي ويهج بالتونك وعقبها حطي كريم الليل واذا كانت بشرتج جافه اوحساسه كثري من الكريم وعقبها نامي ويوم تنشين الصبح بتشوفين الفرق ان شاء الله


بالنسبة للجسم :
بيكون باستخدام سكراب للجسم خالي من العطور-ويكون بعد ما تاخذين الشاور المعتاد تيبين السكراب وتبداين بعمليه التقشير بحركات دائريه باليفه الخاصه بالمقشر-عقب ما تخلصين غسلي جسمج بالماي بس-وعقبها ضروري ترطبين جسمج-لانج لو ما رطبتي الجسم بيعطيج نتيجه عكسيه وما بيتوحد لون الجسم بس بيجف ويسمر اكثر!!

ومعروف انه التقشير يوحد لون الجسم ويحسنه





أنواع البشرة


البشرة الطبيعية العادية


مميزاتها



البشره العاديه-بالنسبه للمحظوظين يكفيهم املاكها لانها ناعمه وجامده الملمس فالوقت نفسه
مافيها مساحات دهنيه او جافه,او بقع او حبوب او مشاكل
منتشره عند الاولاد بس قليله عند الراشدين

البشره العاديه اذا ما اهتمينا فيها بالشكل المناسب يمكن تتحول لبشره حساسه او جافه

بالنسبه لوقي الشمس: اختاري واقي شمس قوامه كريمي وخفيف بنفس الوقت

اقنعه الويه:جدامج خيارات واايده اختاري الي يناسبج واتركي الاقنعه الي فيها عطورات او تكون قوامها ثقيله واايد.




البشرة الدهنية الزيتية

مميزاتها

تمتاز بالمسام الظاهره ومظر برااق تطلع فيها بثور وحب الشباب
ميزه البشره الدهنيه انها تاخر ظهور التجاعيد

ووبالنسبه للمعه البشره ممكن تستخدمين المناديل الخاصه بها-تلاقينها فالصيدليات وفي منها فالبودي شوب بحجام صغيره تقدرين تاخذينها وياج اي مكان تبينه

قناع الويه وواقي الشمس الافضل لج الي يكون على شكل جل
واذا بتسوين القناع فالبيت ممكن اضيفين نقطتين من خل التفاح لاغلاق المسامات.



البشرة الجافة

مميزاتها

تحتوي البشره الجافه على البقع المشققه ,هي دقيقه البنيه وفيها مسام صغيره تحسين انها مشدوده يوم اتنظفيها هي اكثر عرضه لعلامات الشيخوخه الي تييج فعمر صغير مثل الخطوط والتجاعيد نادر ما تطلع فيها بقع بس هي معرضه للاحتكاك والاهتياج

نصيحه لصاحبات البشره الجافه ابتعدي عن الصابون وواستخدمي الغسولات الكريميه بالنسبه للويه والجسم ولا تهملين الترطيب الدايم

واختاري واقي الشمس وقناع الويه الكريمي الثقيل الي مافيه عطورات

واذا انتي سويتي القناع فالبيت ضيفي نقط من زيت الزيتون لترطيب البشره.



البشرة الحساسة




مميزاتها




هي شبيهة بالبشره الجافه وهي تبين الاورده تتميز باللون الوردي فالخدود

افضل مجموعه للعنايه بالبشره الحساسه هب مجموعه الصبار من البودي شوب-واقي الشمس وقناع الويه يكون كريمي ثقيل مافيه عطورات


البشرة المركبة المختلطة


مميزاتها



اكثر نوع من منتشر خصوصا بين المتقدمين فالعمر يكون القسم المتوسط من الويه((الجبهة.الخشم.الذقن))دهني واكثر خشونه من باقي الويه وتكون الخدود عاديه او جافه

نصيحه:لا تنظفين خدودج بقوه يوم تغسلين ويهج بالغسول الصبح

الواقي يكون على شكل جل
وقناع الويه يكون هو بعد على شكل جل لمنطقه((الجبهة.الخشم.الذقن))
واقنعه البشره الجافه او العاديه على الخدود>>>على حسب نوع بشره الخدود





اتمنى تكونوا استفدوا من الموضوع
وانا معدله على الموضوع<<اللهجه

وحذفت منه شوي

للامانه
منقوووول